முதல் 100 மின்சார டிராக்டர் டிரக்குகளை களமிறக்கி, கனரக டிரக்கிங் துறையில் புயலாகக் களமிறங்குகிறது AMPSTAR
AMPSTAR-இன் 4x2 மற்றும் 6x4 மின்சார டிராக்டர் டிரக்குகள் CMVR சான்றிதழையும் பெற்றுள்ளன
சென்னை 28 அக்டோபர் 2026: JSW குழுமத்தின் மின்சார வணிக வாகனப் பிரிவான JSW Greentech Limited, AMPSTAR மின்சார டிரக்குகளின் முதல் வர்த்தக விற்பனையை இன்று அறிவித்துள்ளது. விஜயநகரில் உள்ள JSW Cement நிறுவனத்தில் கனரக தொழில் துறை சரக்குப் போக்குவரத்திற்காக 100 AMPSTAR 4x2 55T டிராக்டர் டிரக் மின்சார பிரைம் மூவர்களுக்கான (Electric Prime Movers) ஆர்டரைப் பெற்றுள்ளது. பேட்டரி சேவை (Battery-as-a-Service - BaaS) வழங்கும் நிறுவனமாக JSW Eco-Mobility மற்றும் லாஜிஸ்டிக் போக்குவரத்து (Logistics) பார்ட்னரான Paradeep பரிவாஹன் லிமிடெட் ஆகியவற்றுடன் இணைந்து இத்திட்டம் மேற்கொள்ளப்படுகிறது.
இந்திய வாகன ஆராய்ச்சிச் சங்கத்திடமிருந்து (ARAI), மத்திய மோட்டார் வாகன விதிகளின் (CMVR) கீழ் AMPSTAR 4x2 மற்றும் 6x4 டிராக்டர் டிரக்குகள் சான்றிதழைப் பெற்றுள்ள வேளையில் இந்த மைல்கல் எட்டப்பட்டுள்ளது. இதன் மூலம், இந்தியச் சாலைகளில் இயங்குவதற்குத் தேவையான பாதுகாப்பு, செயல் திறன் மற்றும் நெறிமுறை தரநிலைகளை இவை பூர்த்தி செய்துள்ளன. இந்த ஆர்டரானது, பிராண்ட் அறிமுகப்படுத்தப்பட்ட ஒரு மாதத்திற்கு சற்று கூடுதல் நேரத்தில், AMPSTAR-இன் பயணத்தை ‘அறிமுக நிலையில்’ இருந்து ‘களப்பயன்பாட்டுக்கு’ எடுத்துச் சென்றுள்ளது.
AMPSTAR 4×2 55T டிராக்டர் டிரக், இந்திய வணிகப் போக்குவரத்தின் கடுமையான செயல்பாட்டுச் சூழல்களுக்கு ஏற்ப வடிவமைக்கப்பட்டு, 430 kW உச்ச ஆற்றலையும் (Peak Power) 2600 Nm உச்ச முறுக்குவிசையையும் (Peak Torque) வழங்குகிறது. இந்த 100 பிரைம் மூவர்களும் JSW Cement Limited நிறுவனத்திற்கான ஒருமுகப்படுத்தப்பட்ட போக்குவரத்து தீர்வின் ஒரு பகுதியாகும். இவை ஆந்திரப் பிரதேசத்தின் நந்தியாத் மற்றும் கர்நாடகாவின் விஜயநகர் இடையே சுமார் 330 கி.மீ தூரமுள்ள போக்குவரத்துப் பாதையில், மாதத்திற்கு தோராயமாக 1.25 லட்சம் டன் எடையுள்ள 'கிளிங்கர்' மற்றும் 'ஸ்லாக்' ஆகியவற்றை ஏற்றிச் செல்லவுள்ளன. JSW Greentech நிறுவனத்தின் துணை நிறுவனமான JSW Eco mobility, இந்த வாகனப் பிரிவுக்குத் தேவையான ஆற்றலை வழங்குவதோடு, விஜயநகர் மற்றும் நந்தியாத் இடையே நான்கு பேட்டரி மாற்றும் நிலையங்களுடன் (Battery-Swapping Stations) ஒரு பிரத்யேக தளவாடப் போக்குவரத்துப் பாதையை அமைக்கும்.
இந்த ஒப்பந்தக் காலத்தில், இச்செயல்பாட்டின் மூலம் சுமார் 4.5 கோடி லிட்டர் டீசல் சேமிக்கப்படும் என்றும், தோராயமாக 6,250 டன் கார்பன் டை ஆக்சைடு (CO₂) உமிழ்வு தவிர்க்கப்படும் என்றும் எதிர்பார்க்கப்படுகிறது.
“எங்களது AMPSTAR பிராண்ட் அறிமுகத்தின் போது முதன்முறையாகக் காட்சிப்படுத்தப்பட்ட 55T மின்சார டிராக்டர் டிரக், வணிகப் போக்குவரத்திலேயே மிகவும் சவாலான வாகன அமைப்புகளில் ஒன்றாகும். ஒரே மாதத்திற்குச் சற்று கூடுதல் காலத்தில், JSW Eco-Mobility நிறுவனத்தை 'பேட்டரி சேவை' (BaaS) பங்காளியாகக் கொண்டு, JSW Cement-இன் தொழில் துறை சரக்குப்போக்குவரத்திற்காக முதல் 100 டிரக்குகளைக் களமிறக்கி நாங்கள் ஒரு குறிப்பிடத்தக்க மைல்கல்லை எட்டியுள்ளோம். இதன் மூலம், தடையில்லாப் பொருட்கள் போக்குவரத்தைச் சாத்தியமாக்க, பேட்டரி மாற்றும் நிலையங்களுடன் கூடிய பிரத்யேக மின்சாரப் போக்குவரத்துப் பாதை உட்பட ஒருங்கிணைக்கப்பட்ட மின்சாரப் போக்குவரத்துச் சூழல் அமைப்பை நாங்கள் உருவாக்கி வருகிறோம். இந்த நகர்வு, மின்சாரக் கனரகப் போக்குவரத்தை வர்த்தக ரீதியாகச் சாத்தியமாக்குவதற்கான எங்களது முழுமையான மின்சாரப் போக்குவரத்துத் தீர்வை ஒருங்கிணைக்கிறது. இந்தியா முழுவதும் வணிக நிறுவனங்கள் சரக்குகளை ஏற்றிச் செல்லும் முறையில் ஒரு மாற்றத்தை ஏற்படுத்துவதில் வினையூக்கியாக இயங்குவதே AMPSTAR-இன் நோக்கம் ஆகும். அந்த இலக்கை நோக்கி வைக்கப்பட்ட ஒரு முக்கியமான அடியை இந்த முதல் 100 டிரக்குகள் குறிக்கின்றன,” என்று JSW Greentech Limited நிறுவனத்தின் முதன்மைச் செயல் அதிகாரி (CEO) சுமித் மிட்டல் தெரிவித்தார்.
“JSW Cement நிறுவனத்தில், மிகவும் நிலையான மற்றும் திறம்பட இயங்கக்கூடிய தொழில் துறை செயல்பாடுகளை உருவாக்க நாங்கள் கடமைப்பட்டுள்ளோம். 100 AMPSTAR மின்சார டிரக்குகளின் களப்பயன்பாடு, எங்களது விநியோகச் சங்கிலியில் பொருட்கள் போக்குவரத்திற்கு ஆதரவளிக்கும் அதே வேளையில், எங்களது தளவாடச் செயல்பாடுகளில் கார்பன் உமிழ்வைக் குறைப்பதற்கான (Decarbonising) ஒரு முக்கியமான அடியைக் குறிக்கிறது. பேட்டரி மாற்றும் உள்கட்டமைப்பால் ஆதரிக்கப்படும் ஒருங்கிணைந்த மின்சாரப் போக்குவரத்துத் தீர்வுடன், எங்களது டீசல் சார்ந்து இயங்கும் தன்மையைக் குறைக்கவும், உமிழ்வைக் குறைக்கவும், மற்றும் செயல்பாட்டுத் திறனைப் பாதிக்காமல் எங்களது நிலைத்தன்மை இலக்குகளை முன்னெடுத்துச் செல்லவும் நாங்கள் இலக்கு வைத்துள்ளோம்,” என்று JSW Cement நிறுவனத்தின் நிதிப் பிரிவு இயக்குநர் நரிந்தர் காலன் தெரிவித்தார்.
AMPSTAR வாகனங்கள், மகாராஷ்டிராவின் சத்ரபதி சம்பாஜிநகரில் (Ch. Sambhajinagar) உள்ள AURIC பகுதியில் சுமார் 90 ஏக்கர் பரப்பளவில் உருவாக்கப்பட்டு வரும் JSW Greentech-இன் ஒருங்கிணைக்கப்பட்ட பசுமைத் தயாரிப்பு ஆலையில் (Greenfield Manufacturing Facility) தயாரிக்கப்படும். இந்த ஆலை ஆண்டிற்கு 15,000 மின்சார பேருந்துகள் மற்றும் டிரக்குகளைத் தயாரிக்கும் திறன் கொண்டதாகும். இதில் தானியங்கி டிரக்-கேபின் பிரிவு (Automated Truck-Cabin Line) மற்றும் ஒருங்கிணைக்கப்பட்ட பேட்டரி சூழல் அமைப்பு ஆகியவை இடம்பெறும். மேலும், இது புனேவில் உள்ள JSW Greentech-இன் ஆராய்ச்சி மற்றும் மேம்பாட்டு (R&D) மையத்தின் ஆதரவையும் பெற்றுள்ளது.
AMPSTAR வாடிக்கையாளர்களுக்கு 150 kW முதல் 500 kW வரையிலான மின் திறன் தேர்வுகளையும், நேரடிக் கொள்முதல், குத்தகை (Lease), 'பேட்டரி சேவை' (BaaS) மற்றும் பிற உரிமையியல் மற்றும் செயல்பாட்டு மாதிரிகளையும் வழங்குகிறது. இதனுடன் சார்ஜிங் உள்கட்டமைப்பு, நிதி உதவி மற்றும் விற்பனைக்குப் பிந்தைய ஆதரவுச் சேவைகளும் வழங்கப்படுகின்றன. டிராக்டர் டிரக்குகளைத் தொடர்ந்து, டிரக் பிரிவை டிப்பர்கள் (Tippers) மற்றும் நிலையான பாடி கொண்ட டம்பர்கள் (Fixed-body Dumpers) என விரிவுபடுத்த திட்டமிடப்பட்டுள்ளது.
