ISPL S3 சாம்பியன்கள் ஏலத்தில் தங்கள் அணியின் முக்கிய வீரர்களைத் தக்கவைத்துக் கொண்ட சென்னை சிங்கம்ஸ்!
சூர்யா இணை உரிமையாளராக உள்ள சென்னை சிங்கம்ஸ் அணியின் கேப்டன் அங்கூர் சிங் மற்றும் துணை கேப்டன் கேதன் மத்ரேவை மீண்டும் அணியில் இணைத்ததுடன், தொடர் நாயகன் ஜகத் சர்க்காரும் தக்க வைப்பு!
சென்னை 18 நவம்பர் 2026: மும்பை தாஜ் லேண்ட்ஸ் எண்ட் (Taj Lands End) நட்சத்திர விடுதியில் ஞாயிற்றுக்கிழமை மாலை நடைபெற்ற இந்தியன் ஸ்ட்ரீட் பிரீமியர் லீக் (ISPL) சீசன் 4 வீரர்கள் ஏலத்தில், சூர்யா இணை உரிமையாளராக உள்ள நடப்பு சாம்பியனான சென்னை சிங்கம்ஸ் அணி, 18 பேர் கொண்ட அணியை உருவாக்கியதோடு, தனது முக்கிய வீரர்களையும் தக்கவைத்துக் கொண்டுள்ளது. கடந்த சீசனின் தொடர் நாயகன் (MVP) ஜகத் சர்க்காரை ₹26.03 லட்சத்திற்கு தக்கவைத்துள்ள இவ்வணி, பேட்டர் கேதன் மத்ரேவை ₹20.05 லட்சத்திற்கு மீண்டும் வாங்கியதுடன், கடந்த சீசனில் அணியை வழிநடத்திய கேப்டன் அங்கூர் சிங்கையும் ₹15.75 லட்சத்திற்கு மீண்டும் அணியில் இணைத்துள்ளது.
அனுபவமிக்க இந்த வீரர்களுடன், வளர்ந்து வரும் இளம் திறமையாளர்களுக்கும் இவ்வணி வாய்ப்பளித்துள்ளது. பீகார் டி10 லீக்கில் விளையாடிய பீகாரைச் சேர்ந்த நம்பிக்கைக்குரிய 19 வயதுக்குட்பட்ட (Under-19) டென்னிஸ் பந்து கிரிக்கெட் வீரர் ஹர்ஷித் கெடியாவை ₹3 லட்சத்திற்கு வாங்கியுள்ளது. மேற்கு மண்டலத்தைச் சேர்ந்த அமித் நாயக் (₹16.65 லட்சம்), கிழக்கு மண்டலத்தைச் சேர்ந்த சர்பராஸ் கான் (₹15 லட்சம்) மற்றும் மேற்கு மண்டலத்தைச் சேர்ந்த ஆஷிஷ் குமார் பால் (₹11.50 லட்சம்) ஆகியோர் இந்த ஏலத்தில் வாங்கப்பட்ட மற்ற முக்கிய வீரர்களாவர்.
சூரத்தில் நடைபெற்ற சீசன் 3 இறுதிப் போட்டியில் டைகர்ஸ் ஆஃப் கொல்கத்தா (Tiigers of Kolkata) அணியை 29 ரன்கள் வித்தியாசத்தில் வீழ்த்தி தனது முதல் ISPL கோப்பையை வென்ற சென்னை சிங்கம்ஸ், நடப்பு சாம்பியனாக சீசன் 4-ல் களமிறங்குகிறது. கடந்த சீசனில் சர்க்கார் தொடர் நாயகன் விருதை வென்றதுடன், இறுதிப் போட்டியில் மத்ரே அதிகபட்சமாக 30 ரன்கள் எடுத்திருந்தது குறிப்பிடத்தக்கது.
ஏலத்திற்குப் பிறகு பேசிய சென்னை சிங்கம்ஸ் அணியின் உரிமையாளர் ராஜ்தீப் குப்தா, “அனைத்து சீசன்களிலும் எங்களது அணுகுமுறை ஒரே மாதிரியாகத்தான் இருந்து வருகிறது. எங்கள் இலக்கு மிகவும் தெளிவானது: லெதர் பந்து கிரிக்கெட்டில் தாங்கள் எதிர்பார்த்த வெற்றியைப் பெற முடியாத வீரர்களுக்கு ஒரு சிறந்த தளத்தை உருவாக்க நாங்கள் விரும்புகிறோம். ISPL தொடரின் காரணமாக டென்னிஸ் பந்து கிரிக்கெட் மிகப் பெரிய அளவில் வளர்ந்து வருகிறது; இதன் மூலம் வீரர்கள் இப்போது இதிலும் தங்களது எதிர்காலத்தை உருவாக்க முடியும். நடப்பு சாம்பியன்கள் என்ற முறையில் நாங்கள் எந்தவித அழுத்தத்தையும் எடுத்துக்கொள்ளவில்லை. எந்தவொரு போட்டியிலும் வெற்றி அல்லது தோல்வி என்பது சகஜம். எப்போது விளையாடினாலும், கடினமாக உழைத்து வெற்றிக்காக மட்டுமே விளையாட வேண்டும்” என்றார்.
திட்டமிடப்பட்ட பயிற்சி முறைகள் மற்றும் தயாரிப்பு நடைமுறைகள் முதல் சரியான ஊட்டச்சத்து வரை, சென்னை சிங்கம்ஸ் அணி தனது கட்டமைப்பை மிகவும் ஒழுங்கான மற்றும் கட்டுக்கோப்பான முறையில் உருவாக்கியுள்ளது. இதன் மூலம் அனுபவம் வாய்ந்த வீரராக இருந்தாலும் சரி, சிறிய நகரத்திலிருந்து வரும் புதுமுக வீரராக இருந்தாலும் சரி, ஒவ்வொரு வீரருக்கும் பயிற்சி பெறுவதற்கு மிகச் சிறந்த வசதிகள் கிடைப்பதை உறுதி செய்கிறது.
இந்தியாவின் முன்னோடி டென்னிஸ் பந்து டி10 லீக் தொடரான ISPL-ன் நான்காவது பதிப்பான சீசன் 4, 2026 டிசம்பர் 6 முதல் 2027 ஜனவரி 3 வரை கோவாவில் நடைபெறவுள்ளது.
முழு அணி விவரம்:
ஜகத் சர்க்கார் (தக்கவைக்கப்பட்டவர், ₹26.03 லட்சம்), கேதன் மத்ரே (₹20.05 லட்சம்), அமித் நாயக் (₹16.65 லட்சம்), அங்கூர் சிங் (₹15.75 லட்சம்), சர்பராஸ் கான் (₹15 லட்சம்), ஆஷிஷ் குமார் பால் (₹11.5 லட்சம்), எஜாஜ் அகமது (₹8 லட்சம்), பூஷண் கோலே (₹6 லட்சம்), வெங்கடாசலபதி மணிமாறன் (₹3.60 லட்சம்), ராஜேஷ் சோர்டே (₹3 லட்சம்), சக்லைன் அக்தர் (₹3 லட்சம்), ஹர்ஷித் கெடியா (₹3 லட்சம்), சுனில் குமார் (₹3 லட்சம்), தீபேஷ் சால்வி (₹3 லட்சம்), யஷ்வந்த் சாஹு (₹3 லட்சம்), விவேக் மோகனன் (₹3 லட்சம்), ஆகாஷ் சிங் (₹3 லட்சம்) மற்றும் உத்கர்ஷ் பதக் (₹3 லட்சம்).