இந்திய உயர்கல்வியில் நிகழும் அமைதிப் புரட்சியைப் பதிவு செய்யும் “போர்ட்ரெய்ட் ஆஃப் மெனி ஃபேசஸ்” ஆவணப்படத்தை வெளியிட்டன ஈராஸ் யுனிவர்ஸ் மற்றும் ஐஐடி மெட்ராஸ்

இந்திய உயர்கல்வியில் நிகழும் அமைதிப் புரட்சியைப் பதிவு செய்யும் “போர்ட்ரெய்ட் ஆஃப் மெனி ஃபேசஸ்” ஆவணப்படத்தை வெளியிட்டன ஈராஸ் யுனிவர்ஸ் மற்றும் ஐஐடி மெட்ராஸ்

சென்னை, இந்தியா: இந்தியாவின் பல்வேறு பகுதிகளைச் சேர்ந்த ஐஐடி மெட்ராஸ் பிஎஸ் பட்டப்படிப்பு (BS Degree) மாணவர்களின் வாழ்க்கையைப் பதிவு செய்யும் போர்ட்ரெய்ட் ஆஃப் மெனி ஃபேசஸ் (Portrait of Many Faces) என்ற ஆவணப்படத்தை வெளியிடுவதாக ஈராஸ் யுனிவர்ஸ் (Eros Universe) நிறுவனமும், இந்தியத் தொழில்நுட்பக் கழகம் மெட்ராஸும் (ஐஐடி மெட்ராஸ் - IIT Madras) இன்று அறிவித்தன. இந்தப் படம் அக்டோபர் 12, 2026 முதல் ஈராஸ் நவ் (Eros Now) தளத்தில் உலகம் முழுவதும் இலவசமாக ஸ்ட்ரீம் ஆகி வருகிறது. சென்னை ஐஐடி மெட்ராஸ் வளாகத்தில் உள்ள ICSR கட்டடத்தின் TTJ அரங்கில் இன்று நடைபெற்ற பிரீமியர் திரையிடல் மற்றும் ஊடக முன்னோட்ட நிகழ்ச்சியில், இந்தப் படம் முதல்முறையாகத் திரையிடப்பட்டது. ஐஐடி மெட்ராஸ் பிஎஸ் பட்டப்படிப்பைச் சேர்ந்த 17 மாணவர்கள் இடம்பெற்றுள்ள இந்தப் படத்தின் டிரெய்லரை, மத்தியக் கல்வி அமைச்சர் திரு. பிரல்ஹாத் ஜோஷி முன்னதாகப் பார்வையிட்டார்.

வெளியீட்டுக்கு முன்னதாக, அக்டோபர் 7, 2026 அன்று ஐஐடி மெட்ராஸுக்கு வருகை தந்த மாண்புமிகு மத்தியக் கல்வி அமைச்சர் திரு. பிரல்ஹாத் ஜோஷிக்கு, இந்தப் படத்தின் டிரெய்லர் முதன்முதலாகத் திரையிட்டுக் காட்டப்பட்டது. டிரெய்லரைப் பார்த்த அமைச்சர், விரைவில் வெளியாகவுள்ள படத்துக்காகக் குழுவினரைப் பாராட்டி, வாழ்த்துத் தெரிவித்தார்.

இதுகுறித்து ‘போர்ட்ரெய்ட் ஆஃப் மெனி ஃபேசஸ்’ படத்தின் இயக்குநரும் படத்தொகுப்பாளருமான ஷாஷ்வத் முகர்ஜி கூறியதாவது:

“சிறு வயதிலிருந்தே, உயர்கல்வியைத் தொடர்ந்துகொண்டே சினிமாவிலும் பணியாற்ற வேண்டும் என்பது என் விருப்பம். ஆனால், இவை இரண்டையும் ஒருசேர மேற்கொள்வது ஒரு காலத்தில் சாத்தியமற்றதாகவே தோன்றியது. ஐஐடி மெட்ராஸ் பிஎஸ் பட்டப்படிப்பு அதைச் சாத்தியமாக்கியது. என் பயணத்தை ஆழமாக வடிவமைத்த இந்தப் படிப்புக்கு ஏதாவது திருப்பித் தர வேண்டும் என்ற எண்ணத்தில் உருவானதுதான் இந்தப் படம். இந்தியக் கல்வியில் நிகழும் அமைதியான மாற்றத்தைத் தங்கள் வாழ்க்கையில் பிரதிபலிக்கும் மாணவர்களின் கதைகளை ஆவணப்படுத்துவது, பின்னர் ஒரு பொறுப்பாகவும் மாறியது” என்றார்.

ஈராஸ் நவ் மற்றும் ஈராஸ் யுனிவர்ஸ் நிறுவனங்களின் தலைமைச் செயல் அதிகாரி (CEO) விக்ரம் டன்னா கூறுகையில், “உண்மையான மனிதர்கள், உண்மையான இல்லங்கள், உண்மையான கனவுகள் ஆகியவற்றை நேர்மையுடன் சொல்லும் இதுபோன்ற கதைகளில்தான் ஈராஸ் எப்போதும் நம்பிக்கை வைத்துள்ளது. கல்விக்கான வாய்ப்பு ஒருவரின் வாழ்க்கைப் பாதையை எப்படி மாற்றக்கூடும் என்பதையும், இந்திய இளைஞர்கள் பலர் தங்கள் எதிர்காலத்தைத் தங்கள் விருப்பப்படியே எப்படி வடிவமைத்துக்கொள்கிறார்கள் என்பதையும் ‘போர்ட்ரெய்ட் ஆஃப் மெனி ஃபேசஸ்’ காட்டுகிறது. இந்தக் குரல்களை ஈராஸ் நவ் தளத்தில் இலவசமாக, உலகெங்கும் உள்ள பார்வையாளர்களிடம் கொண்டுசேர்க்க ஐஐடி மெட்ராஸுடன் கைகோர்த்ததில் பெருமை கொள்கிறோம். டிரெய்லரைப் பார்த்து, குழுவினரை ஊக்கப்படுத்திய மாண்புமிகு மத்தியக் கல்வி அமைச்சருக்கு எங்கள் நன்றி” என்றார்.

ஐஐடி மெட்ராஸ் இயக்குநர் பேராசிரியர் வீழிநாதன் காமகோடி கூறுகையில், “கல்வி குறித்து சுவாமி விவேகானந்தர் மிக ஆழமான ஒரு கருத்தைக் கூறினார்: ஏழைகளால் கல்விக்கான செலவை ஏற்க முடியாவிட்டால், கல்வி ஏழைகளைச் சென்றடைய வேண்டும். இதனால் ஈர்க்கப்பட்டே, ஐஐடி மெட்ராஸ் வளாகத்துக்கு வெளியிலிருந்து படிக்கும் (ஆஃப்-கேம்பஸ்) பிஎஸ் படிப்புகளை அறிமுகப்படுத்தியது. இதில் சேர்ந்துள்ள மாணவர்களில் 25%-க்கும் மேற்பட்டோர் வறுமைக் கோட்டுக்குக் கீழ் உள்ளவர்கள். விவேகானந்தரின் இந்தக் கருத்து எவ்வாறு நடைமுறைக்கு வந்துள்ளது என்பதை வெற்றிக் கதைகள் மூலம் எடுத்துச் சொல்லும், மிகவும் உணர்ச்சிப்பூர்வமான, சிந்திக்கத் தூண்டும் ஆவணப்படம் ‘போர்ட்ரெய்ட் ஆஃப் மெனி ஃபேசஸ்’. இந்த அருமையான முயற்சிக்காக ஷாஷ்வத் முகர்ஜிக்கும் அவரது குழுவினருக்கும் எனது வாழ்த்துகள். இந்த ஆவணப்படம் உலகின் மூலை முடுக்கெல்லாம் சென்றடைய வேண்டும் என்று வாழ்த்துகிறேன். ஜெய் ஹிந்த்” என்றார்.

ஐஐடி மெட்ராஸ் மற்றும் ஈராஸ் யுனிவர்ஸ் இணைந்து தயாரித்துள்ள போர்ட்ரெய்ட் ஆஃப் மெனி ஃபேசஸ் ஆவணப்படத்தை, ஐஐடி மெட்ராஸ் பிஎஸ் பட்டப்படிப்பின் முன்னாள் மாணவரான ஷாஷ்வத் முகர்ஜி இயக்கி, படத்தொகுப்பும் செய்துள்ளார். இந்தியாவின் பல்வேறு பகுதிகளைச் சேர்ந்த, முற்றிலும் மாறுபட்ட சமூக, பொருளாதார மற்றும் புவியியல் பின்னணிகளைக் கொண்ட மாணவர்களை இந்தப் படம் பின்தொடர்கிறது. அவர்களின் இல்லங்களுக்குள்ளும் அன்றாட வாழ்க்கைக்குள்ளும் நெருக்கமாகப் பயணிக்கும் இந்தப் படம், கடுமையான தரத்துடன், அதே சமயம் நெகிழ்வாகவும் வழங்கப்படும் கல்விக்கான வாய்ப்பு, அவர்களின் கனவுகள், தன்னம்பிக்கை மற்றும் எதிர்காலத்தை எவ்வாறு மாற்றியுள்ளது என்பதைப் பதிவு செய்கிறது.

இந்த ஆவணப்படத்தில் 17 மாணவர்கள் பிரதிநிதிக் குரல்களாக இடம்பெற்றுள்ளனர். இந்தப் படிப்பில் சேர்ந்துள்ள கிட்டத்தட்ட 50,000 மாணவர்களின் ஒட்டுமொத்தச் சித்திரமாக அவர்கள் திகழ்கின்றனர். தனிப்பட்ட வெற்றிக் கதைகளை மட்டுமின்றி, இந்திய உயர்கல்வியில் நிகழும் அமைதிப் புரட்சியையும் அவர்களின் கதைகள் வெளிப்படுத்துகின்றன.