சமாளிக்க முடியாமல் தவிப்பு: முதியவர்கள் எதிர்கொள்ளும் காலநிலை அபாயங்களும் சமூக சவால்களும்
நெருக்கடிக்குள்ளாகும் மீள்திறன் | அரசுத் திட்டங்கள் ஒரு வாழ்வாதாரம் | குடும்ப மற்றும் சமூக ஆதரவு வலுப்பட வேண்டும்
புதுதில்லி, ஜூன் 15, 2026. இன்று ‘உலக முதியோர் துன்புறுத்தல் விழிப்புணர்வு தினத்தை’ முன்னிட்டு, ஹெல்ப்ஏஜ் இந்தியா (HelpAge India) அமைப்பு, ‘காலநிலை மாற்றத்தை தாங்கும் முதியோர் பருவம் – கவனிப்பு, கண்ணியம் மற்றும் உரிமையை உறுதி செய்தல்’ (Climate Resilient Ageing – Ensuring Care, Dignity & Agency) என்ற தனது முதல் மற்றும் வரலாற்று முக்கியத்துவம் வாய்ந்த ஆய்வு அறிக்கையை இந்தியா சர்வதேச மையத்தில் வெளியிட்டது. அரசு, சமுதாயம், கல்வித்துறை மற்றும் ஊடகங்களைச் சேர்ந்த முக்கியப் பிரமுகர்கள் பங்கேற்ற இந்நிகழ்வில் இந்த அறிக்கை முறைப்படி வெளியிடப்பட்டது. இந்நிகழ்வில், நிர்வாகக் குழு உறுப்பினர்களான திரு. கிரண் கர்னிக் அவர்கள், தலைவர், திருமதி. ரும்ஜும் சாட்டர்ஜி அவர்கள், துணைத் தலைவர் ஆகியோர் முன்னிலை வகித்தனர். இந்திய அரசின் ஊரக வளர்ச்சித் துறையின் முன்னாள் செயலாளரான திரு. அமர்ஜீத் சின்ஹா அவர்கள் சிறப்புரை ஆற்றினார். இவர்களுடன், ஹெல்ப்ஏஜ் இந்தியாவின் கௌரவ பிராண்ட் தூதரும், புகழ்பெற்ற கலைஞருமான திருமதி. ஷர்மிளா தாகூர் அவர்கள் சிறப்பு விருந்தினராகக் கலந்துகொண்டார்.
ஆந்திரப் பிரதேசம், பீகார், குஜராத், கர்நாடகா, கேரளா, மத்தியப் பிரதேசம், மகாராஷ்டிரா, ஒடிசா, தமிழ்நாடு, உத்தரகாண்ட் ஆகிய 10 மாநிலங்களில் உள்ள 20 மாவட்டங்களைச் சேர்ந்த 2,224 முதியவர்களிடம் நடத்தப்பட்ட இந்தத் தேசிய அளவிலான ஆய்வு, இந்தியாவின் கிராமப்புற முதியவர்கள் மீது காலநிலை மாற்றம் ஏற்படுத்தியுள்ள ஆழமான தாக்கத்தையும், பின்தங்கிய நிலையிலுள்ள முதியவர்கள் எவ்வாறு பலதரப்பட்ட அதிக ஆபத்துள்ள சவால்களை எதிர்கொள்கிறார்கள் என்பதையும் வெளிப்படுத்துகிறது. பல்வேறு காரணிகளை உள்ளடக்கிய (IPP) ஆய்வுக் கட்டமைப்பின்படி, முதியவர்களின் காலநிலை பாதிப்பு என்பது வயதால் மட்டுமே ஏற்படுவதில்லை. மாறாக, பாலினம், உடல் குறைபாடு மற்றும் நடமாட்டக் குறைவு, வறுமை, அவர்கள் வாழும் சூழல், புவியியல் இருப்பிடம் ஆகிய பல காரணிகளின் கூட்டுத் தாக்கத்தால் ஏற்படுகிறது என்பதை இது சுட்டிக்காட்டுகிறது.
ஆய்வில் பங்கேற்றவர்களில் குறிப்பிடத்தக்க அளவாக 78% முதியவர்கள் கடந்த மூன்று ஆண்டுகளில் குறைந்தது ஒரு காலநிலை சார்ந்த பாதிப்பையாவது சந்தித்துள்ளனர் - வெப்ப அலைகள் (45%), வெள்ளம் (27%), வறட்சி (20%) ஆகியவை மிகவும் பொதுவாகப் பதிவாகிய பாதிப்புகள் ஆகும். இந்த பாதிப்புகளுக்கு உள்ளானவர்களில் மூன்றில் ஒரு பங்கிற்கும் அதிகமானோர், தங்கள் வாழ்க்கையில் நடுத்தரம் முதல் கடுமையான பாதிப்புகளைச் சந்தித்துள்ளதாகத் தெரிவித்துள்ளனர். தனியாக வாழும் முதியவர்கள் (13%), விதவைகள் (33%), 80 வயது மற்றும் அதற்கு மேற்பட்டவர்கள் (28%), மற்றும் ஞாபக மறதி, தகவல் தொடர்புக் குறைபாடு அல்லது மனநலப் பாதிப்புகள் உள்ள முதியவர்கள் (12%) ஆகியோர் மற்றவர்களை விட மிக அதிகமான சவால்களையும் ஆபத்துகளையும் எதிர்கொள்கின்றனர்.
"காலநிலை மாற்றத்தின் அதிர்ச்சிகளால் அதிகம் பாதிக்கப்படக்கூடிய நிலையில் முதியவர்கள் உள்ளனர், குறிப்பாக தனியாக வாழ்வோர் அல்லது உடல் குறைபாடுகள் உள்ளவர்கள் பெரும் ஆபத்தில் இருக்கிறார்கள். ஆனாலும், காலநிலை மாற்ற எதிர்கொள்ளல் முயற்சிகளில் அவர்கள் பெரும்பாலும் கவனிக்கப்படாமலேயே இருக்கிறார்கள். காலநிலை மாற்றத்தின் தாக்கங்கள் வெறும் உடல் ரீதியான ஆபத்துகளோடு நின்றுவிடுவதில்லை. மாறாக ஆரோக்கியம், வருமானம், இருப்பிடம், கவனிப்பு மற்றும் சமூக நல்வாழ்வு ஆகியவற்றையும் பெருமளவில் பாதிக்கின்றன. பெரும்பாலான முதியவர்கள் இதைச் சமாளிக்கத் தங்களால் இயன்ற அனைத்தையும் செய்தபோதிலும், உடல், நிதி அல்லது சமூகம் சார்ந்த வயது முதிர்வு சவால்கள், இத்தகைய காலநிலை நிகழ்வுகளுக்குத் தயாராவதற்கும், அவற்றைத் தாங்குவதற்கும் அல்லது மீண்டு வருவதற்கும் உள்ள அவர்களது திறனைக் கட்டுப்படுத்துகின்றன. இது அவர்களின் சுயமுடிவெடுக்கும் திறனையும் மீள்திறனையும் பலவீனப்படுத்துகிறது. அரசுத் திட்டங்கள் ஒரு முக்கியமான பாதுகாப்பு வளையத்தை வழங்கினாலும், நலத்திட்டங்களுக்கான அணுகலை மேம்படுத்துவதோடு, குடும்பம், சமூகம் மற்றும் நிறுவன அளவிலான இலக்கு சார்ந்த தலையீடுகளுடன் கூடிய பலமுனை அணுகுமுறை அவசியமாகிறது. காலநிலை மாற்றத் தகவமைப்பு, காலநிலை நிதியுதவி, முதியவர்களை மையமாகக் கொண்ட பேரிடர் அபாயக் குறைப்பு மற்றும் சமூகப் பாதுகாப்பு கொள்கைகளில் முதியோர் நலனை ஒருங்கிணைப்பது மிகவும் இன்றியமையாதது," என்று ஹெல்ப்ஏஜ் இந்தியாவின் சிஇஓ ரோஹித் பிரசாத் அவர்கள் கூறுகிறார்.
வெப்ப அலைகளின் தாக்கம் முதியவர்களுக்குப் பெரும் சவால்களை ஏற்படுத்துகிறது, குறிப்பாக குடிசை அல்லது போதிய காற்றோட்டம் இல்லாத வீடுகளில் வசிப்பவர்கள் இதனால் அதிகம் பாதிக்கப்படுகின்றனர். இவர்களில் 60% பேர் தங்களது வீடுகள் முழுமையாகப் பாதுகாப்பாக இல்லை என்று தெரிவித்துள்ளனர். வெப்ப அலைகளால் பாதிக்கப்பட்ட பெரும்பாலோர் வீட்டிற்குள்ளேயே தங்கியிருந்தாலும் (90%), மற்றும் தண்ணீர் குடிப்பதை அதிகரித்த போதிலும் (81%), இன்னமும் உடல்நலக்குறைவு அதிகரித்தே வருகிறது (74%), ஏற்கனவே இருக்கும் நோய்கள் மோசமடைகின்றன (44%), மற்றும் மருத்துவச் சேவைகளைப் பெறுவது கடினமாகிறது (33%). 80 வயதுக்கு மேற்பட்ட முதியவர்கள், விதவைகள் மற்றும் அறிவாற்றல் அல்லது நடமாட்டக் குறைபாடு உள்ளவர்களுக்கு இத்தகைய பாதிப்புகள் இன்னும் தீவிரமடைகின்றன. இவர்கள் பொருளாதாரம், சமூகம், ஆரோக்கியம் மற்றும் சுற்றுச்சூழல் ரீதியாக ஒன்றோடொன்று பின்னிப்பிணைந்த பலதரப்பட்ட இன்னல்களை எதிர்கொள்கின்றனர்.
குடும்பங்கள் இதனைச் சமாளிக்கப் பயன்படுத்தும் உத்திகளில், தண்ணீர்ப் பயன்பாட்டைக் குறைத்தல் (73%), தண்ணீரைச் சேமித்து வைத்தல் (58%), வாழ்வாதார நடவடிக்கைகளை மாற்றுதல் (42%) மற்றும் வெளியில் இருந்து தண்ணீரை விலைக்கு வாங்குதல் (32%) ஆகியவை அடங்கும். ஆரோக்கியத்தைப் பொறுத்தவரை, கிட்டத்தட்ட பாதி பேர் நீண்டகாலக் குறைபாடுகளுடன் வாழ்கின்றனர், முக்கியமாக நடமாட்டக் குறைபாடு (32%) மற்றும் பார்வைக் குறைபாடு (24%) ஆகும். இருப்பினும், பலரும் அத்தியாவசிய மருத்துவச் சேவைகளைப் பெறப் போராடுகிறார்கள், குறிப்பாக பாதிக்கும் மேற்பட்டவர்களால் (52%) மருந்துச் செலவுகளைச் சமாளிக்க முடிவதில்லை.
அரசு மருத்துவ வசதிகளே இன்னமும் சுகாதாரச் சேவை வழங்குவதில் முக்கியத் தூணாக விளங்குகின்றன. இதில் ஆரம்பச் சுகாதார நிலையங்கள் (51%), அரசு மருத்துவமனைகள் (49%) ஆகியவை மிகவும் பொதுவாகப் பயன்படுத்தப்படும் சேவைகளாக உள்ளன.
இந்தியாவில் உள்ள பெரும்பாலான முதியவர்களுக்குக் குடும்பமே ஆதரவின் முக்கிய அடித்தளமாகத் திகழ்கிறது, இதில் 73% பேர் பிள்ளைகள் அல்லது உறவினர்களுடன் வாழ்கின்றனர், மேலும் கவனிப்பு தேவைப்படும் 94% முதியவர்கள் தங்களது குடும்ப உறுப்பினர்களிடம் இருந்தே அதைப் பெறுகின்றனர். மகன்கள் (31%), துணைவர்கள் (30%), மருமகள்கள் (17%) ஆகியோர் பெரும்பாலும் இந்த அரவணைப்பை வழங்குகின்றனர், இருப்பினும் இந்த முறைகள் பாலினத்தைப் பொறுத்து மாறுபடுகின்றன: முதிய ஆண்களில் கிட்டத்தட்ட பாதி பேரை அவர்களது மனைவிகள் கவனித்துக்கொள்கிறார்கள், அதேசமயம் விதவைப் பெண்கள் முதன்மையாகத் தங்களது பிள்ளைகளையே சார்ந்துள்ளனர்.
இந்தச் சார்பு வயது கூடும்போது அதிகரிக்கிறது, ஆனால் இடப்பெயர்ச்சியால் இது நெருக்கடிக்குள்ளாகிறது. ஏனெனில் 18% குடும்பங்கள் தங்களது குடும்ப உறுப்பினர் ஒருவர் வேலைக்காக வேறு இடத்திற்கு இடம்பெயர்ந்துள்ளதாகத் தெரிவித்துள்ளனர். இவ்வாறு இடம்பெயர்பவர்களில் பெரும்பாலோர் மகன்களாக (76%) இருக்கின்றனர், இது முதியவர்களுக்கான குடும்பம் சார்ந்த கவனிப்பு மற்றும் ஆதரவு கிடைப்பதைக் குறைப்பதற்கான வாய்ப்பை ஏற்படுத்துகிறது. தனியாக வாழும் முதியவர்களைப் பொறுத்தவரை, கவனிப்பு ஏற்பாடுகள் மிகவும் பலவீனமாக உள்ளன: 38% பேர் அண்டை வீட்டாரையும், 20% பேர் தூரத்து உறவினர்களையும் சார்ந்துள்ளனர், மேலும் 16% பேருக்கு எந்தவொரு கவனிப்பும் கிடைப்பதில்லை. இது அவர்களைத் தனிமை, போதிய மருத்துவச் சேவை கிடைக்காமை, காலநிலை அதிர்ச்சிகளின் போது மீள்திறன் குறைதல் போன்ற பாதிப்புகளுக்கு ஆளாக்குகிறது.
“இந்த அறிக்கை முதியோர் பருவத்திற்கும் காலநிலை மாற்றத்திற்கும் இடையிலான கூட்டுத் தாக்கத்தை வெளிச்சமிட்டுக் காட்டுகிறது. மீண்டும் மீண்டும் ஏற்படும் காலநிலை அபாயங்கள் முதியவர்களை - குறிப்பாக பெண்கள், விதவைகள், தனியாக வாழ்வோர், உடல் குறைபாடு உள்ளவர்கள், மிக வயதான முதியவர்கள் ஆகியோரை மிகக் கடுமையாகப் பாதிக்கின்றன. குறைந்த கல்வி, சேமிப்பின்மை, மோசமான ஆரோக்கியம் ஆகியவற்றால் ஏற்கனவே பின்தங்கிய நிலையில் உள்ள ஒரு பெரிய பகுதியினர், நலத்திட்டங்களையும் குடும்ப ஆதரவையும் மட்டுமே பெரிதும் நம்பியுள்ளனர். முதிய பெண்கள், மற்றவர்களைக் கவனித்துக்கொள்வது முதல் தண்ணீர் மற்றும் வருமானத்தைப் பாதுகாப்பது வரை பலதரப்பட்ட சுமைகளைத் தாங்குகிறார்கள். இத்தகைய சூழலில், எளிதாகப் பெறக்கூடிய அத்தியாவசியச் சேவைகள் என்பது வெறும் முக்கியமானது மட்டுமல்ல - அவர்கள் உயிர்வாழ்வதற்கே இன்றியமையாதது ஆகும்,” என்று ஹெல்ப்ஏஜ் இந்தியாவின் கொள்கை ஆராய்ச்சி மற்றும் ஆலோசனைப் பிரிவின் தலைவர் அனுபமா தத்தா அவர்கள் கூறுகிறார்.
மறுபுறம், பெரிதும் எதிர்பார்க்கப்படும் சமூக ஆதரவும் அதற்கான வலைப்பின்னல்களும் வரம்புக்குட்பட்டதாகவே உள்ளன. தேவைப்படும்போது சமூக ஆதரவு எப்போதும் கிடைப்பதாக 33% பேர் மட்டுமே தெரிவித்துள்ளனர், அதே நேரத்தில் ஆதரவு அரிதாகவே அல்லது ஒருபோதும் கிடைப்பதில்லை என்று 25% பேர் கூறுகின்றனர்.
பொருளாதாரப் பாதுகாப்பு பலவீனமாக உள்ளது: 55% பேருக்கு விவசாய நிலம் இல்லை, கிட்டத்தட்ட பாதி பேருக்கு (49%) பென்ஷனே முக்கிய வருமானமாக உள்ளது, இருப்பினும் பலர் சொந்த விவசாயம் (25%), விவசாயக் கூலி வேலை (13%) அல்லது விவசாயம் அல்லாத இதர கூலி வேலைகளில் (12%) தொடர்ந்து ஈடுபட்டு வருகின்றனர். கவலையளிக்கும் விதமாக, 16% பேருக்கு வேலையும் இல்லை, வருமானமும் இல்லை. வயது அதிகரிக்கும்போது, விவசாயம் மற்றும் கூலி வேலைகளில் தீவிரமாகப் பங்கேற்பது குறைகிறது. அதே சமயம் வேலையும் வருமானமும் இல்லாதவர்களின் விகிதம் 60-69 வயது உடையவர்களிடையே 11% ஆக இருந்து, 80 வயதுக்கு மேற்பட்டவர்களிடையே 21% ஆக உயர்கிறது, இது பிற்கால வாழ்க்கையில் பொருளாதார ஆபத்தை அதிகரிக்கிறது.
பிடிஎஸ் (PDS) (93%), பென்ஷன்கள் (71%), மானிய விலையிலான சுகாதாரச் சேவை (67%), வீட்டுவசதி உதவி (62%) போன்ற அரசு நலத்திட்டங்கள் குறித்த விழிப்புணர்வு அதிகமாக உள்ளது. இதில் 65% பேர் இவற்றை எளிதாக அணுக முடிகிறது என்றும், அவர்களில் பெரும்பாலோர் வழக்கமாகப் பலன்களைப் பெறுகிறார்கள் என்றும் தெரிவித்துள்ளனர். பென்ஷன்கள், பிடிஎஸ், ஆயுஷ்மான் பாரத்-பிஎம்ஜெய் ஆகியவை இணைந்து நிதி, உணவு மற்றும் சுகாதார ஆதரவை வலுப்படுத்துகின்றன. மோசமான ஆரோக்கியத்துடன் இருக்கும் முதியவர்கள் (30%), காலநிலை சார்ந்த அதிர்ச்சிகளால் கடுமையாகப் பாதிக்கப்பட்டவர்கள் (30%), முறையான கல்வி இல்லாதவர்கள் (22%), பின்தங்கிய சமூக-பொருளாதாரப் பிரிவினர் (22%) ஆகியோருக்கு இந்தத் திட்டங்களை அணுகுவது பெரும் சவாலாக உள்ளது. கூடுதல் சவால்களாக, நீண்டநேரம் காத்திருக்க வேண்டியிருப்பது மற்றும் காலதாமதங்கள் (25%), டிஜிட்டல் முறையில் அணுகுவதில் உள்ள சிரமங்கள் (15%), விண்ணப்பிக்கும் செயல்பாட்டின்போது ஆதரவு இல்லாமை (10%) ஆகியவை உள்ளன, இது முதியவர்களுக்கு உகந்த சேவை வழங்கலின் அவசியத்தை உணர்த்துகிறது.
தனக்குள்ள கள அனுபவத்தின் அடிப்படையில், ஹெல்ப்ஏஜ்-இன் வாழ்வாதாரம் மற்றும் மீள்திறன் பிரிவின் திட்டத் தலைவர், கிரிஷ் மிஸ்ரா அவர்கள் இவ்வாறு கூறுகிறார், "காலநிலை மாற்றம் கிராமப்புற இந்தியாவில் உள்ள முதியவர்களின் ஆரோக்கியம், வாழ்வாதாரம், கவனிப்பு மற்றும் கண்ணியத்தைப் பெருமளவில் பாதித்து வருகிறது. முதியவர்கள் இந்தச் சவால்களுடன் போராடி வருகிறார்கள் என்பதை நமது கள அனுபவம் காட்டினாலும், அதே வேளையில் இவற்றுக்கான தீர்வின் ஒரு பகுதியாக அவர்கள் விளங்குவதையும், இன்னும் அதிகமாகப் பங்களிப்பதற்கான அவர்களின் பயன்படுத்தப்படாத திறனையும் அது வெளிப்படுத்துகிறது. அவர்கள் தங்களது அறிவு, பாரம்பரிய ஞானம், அனுபவம், கூட்டு நடவடிக்கை ஆகியவற்றின் மூலம் காலநிலை பாதிப்புகளை எதிர்கொள்ளச் சமூகங்களுக்கு ஆதரவளிக்கிறார்கள். முதியோர் சுயஉதவிக் குழுக்களும் (ESHGs) இதர சமூக அமைப்புகளும், முதியவர்கள் ஆதரவைப் பெறுவதற்கும் உள்ளூர் தீர்வுகளில் பங்கேற்பதற்கும் முக்கியப் பங்காற்றுகின்றன. காலநிலை மீள்திறனை உருவாக்குவது என்பது முதியவர்களை ஆபத்துகளில் இருந்து பாதுகாப்பது மட்டுமல்ல, அவர்களின் பலத்தை அங்கீகரித்து, வலுவான மற்றும் அதிக மீள்திறன் கொண்ட சமூகங்களை உருவாக்க அவர்கள் தொடர்ந்து பங்களிக்கும் வகையில் அவர்களை மேம்படுத்துவதும் ஆகும்."
செயல்படுவதற்கான அழைப்பு: காலநிலை மாற்றம், மக்கள்தொகை மூப்படைதல் ஆகிய ஒன்றோடொன்று பின்னிப்பிணைந்த யதார்த்தங்களை நாம் கூட்டாக எதிர்கொள்ளும் வேளையில், காலநிலை நடவடிக்கைகளால் மட்டுமே மீள்திறனை உருவாக்கிவிட முடியாது என்பதை இந்த ஆய்வு சுட்டிக்காட்டுகிறது. இது முதியவர்களின் திறன்களையும் சுயமுடிவெடுக்கும் ஆற்றலையும் வலுப்படுத்தவும், காலநிலைத் தகவமைப்பு மற்றும் பேரிடர் அபாயக் குறைப்பு முயற்சிகளில் அவர்களின் குரல்கள் சேர்க்கப்படுவதை உறுதி செய்யவும், மிகக் கடுமையான பாதிப்புகளை எதிர்கொள்பவர்களுக்கான ஆதரவிற்கு முன்னுரிமை அளிக்கவும் அழைப்பு விடுக்கிறது. அதே வேளையில், சுகாதாரச் சேவைகள், கவனிப்பு நெட்வொர்க்குகள், சமூகப் பாதுகாப்பு ஆகியவற்றை வலுப்படுத்தும் அதே நேரத்தில், முதியவர்கள் நம்பியிருக்கும் குடும்பம், சமூகம் மற்றும் நிறுவன அமைப்புகளில் முதலீடு செய்வதும் சம அளவில் முக்கியமானது. மாறிவரும் இக்காலநிலையிலும் முதியவர்கள் கண்ணியத்துடனும், பாதுகாப்புடனும், மீள்திறனுடனும் வாழ்வதை உறுதி செய்ய இத்தகைய கூட்டு நடவடிக்கைகள் மிகவும் இன்றியமையாததாக இருக்கும்.
About HelpAge India
HelpAge India is a leading non-profit organization working with and for older people in India for the past 48 years. It runs healthcare, age care, livelihood, disaster response and digital empowerment programs throughout the country & strongly advocates for the older persons, working collaboratively with stakeholders. It became the first and only Indian organization to be honored with the ‘UN Population Award 2020’ for its exemplary work in the field of ageing and population issues, and earlier in 2014, has been the recipient of ‘Vayoshreshtha Samman’ by Government of India as an institution working for senior citizens.
Elder ‘Voices from the Ground’ (film link) I For more details visit HelpAge India
